النصابين ....اشكال والوان

]


ازيكم يا شباب ,,, يااارب تكونوا بخير
عندي موضوع ليكم النهارده قراته في منتدي اخر وعجبني جداا




اسمه : " النصابين .. اشكال والوان "





الموضوع بيتكلم عموما عن مشكله اجتماعيه وعن بعض الشباب الضايع اللي بعد عن دينه واصبح كل همه الدنيا والبنات وكاتب الموضوع اسماهم " النصابين " لكي نحذر منهم وخصوصا انتِ يا اختي الكريمه ....!




******




اللي يعيش ياما يشوف ، واللي يلف الدنيا يقابل نصابين كتير ، واللي يقعد على النت كتير يقابل نصابين بس من نوع تاني : نصابين البنات !! دول بيكونوا منشنين على البنات ، بيدوروا عليهم عشان يصطادوهم ، وكل واحد وأسلوبه .. وكل واحد وشطارته
قابلت منهم أنواع كتير ، وعرفت عنهم معلومات أكتر ، وحبيت أنقل "خبرتي" عشان الناس تاخد بالها منهم وتعرف حقيقتهم ودول اللي جم في دماغي دلوقتي ..




((( النصاب المتدين )))





كلامه بيقول إنه عايش عشان يرضي ربنا ويعبده ، لكن حاله بيقول إن همه البنات ليس إلا . لما يكون بيكلم بنت ، أكيد كلامهم بيدور حول تفسير آيه !! أو معلومة دينية أو حتى رأي فلسفي كبير وكلام مكلكع في قضية من قضايا الحياة !!



طول ما هو قاعد معاها مش في دماغه صلاة ، وإذا افتكرها يبقى عشان يعرفها إنه بيصلي !! لأ وفي المسجد كمان !! ( بعد إذنك هانزل أصلي في الجامع وأرجع نكمل كلامنا) - ( صليتي الفجر النهاردة ؟؟ مرنتيش عليا ليه ؟)



راجع الكلام هتلاقيه مليان كلمات على غرار : أختي الغالية / بارك الله فيكي / ادعيلي
ومفيش مانع كمان يذم الولاد الوحشين اللي بيضحكوا على البنات !!
بالتأكيد هتلاقيهم مرة اتفقوا يحفظوا القرآن مع بعض !! أو حتى ينصحها بالحجاب أو قيام الليل ( هازعل بجد لو عرفت إنك قلعتي الحجاب )



النتيجة قبل النهائيه :




هي : بحبك، هو :بحبك ( ايه الالتزام ده كله !!)



النتيجة النهائية :




غالبا بطيخ .. وبيبانوا قدام بعض وبيفقدوا احترامهم لنفسهم ، وحتى بيفقدوا الخيط الرفيع اللي كان بيربط كل واحد فيهم بالله



النتيجة بعد النهائية :




هتقول ايه لربنا لما يواجهك بجريمتك ؟ بتنصب باستخدام دين الله وكلام الله ؟ انت عارف مصيبة "من حفظ القرآن ليجاري به العلماء أو ليماري به السفهاء" ؟ أهو انت زيه كده أو أسوأ



نصيحة :




لا يتقرب (بضم الياء) إلى الله بمعصيته .. متضحكش على نفسك ومتضحكيش على نفسك وتفتكري إنه بيشدك ناحية الصح ، بالعكس ده بيزقك وبياخد بحجزك عن الصح "الذين ضل سعيهم في الحياة الدنيا وهم يحسبون أنهم يحسنون صنعا"









((( النصاب الرومانسي )))


في الغالب بيكون واقع في مشكلة : مشكلة في البيت أو مشكلة عاطفية - أي مشكلة والسلام - ويا عيني دايما بيكون بيكون مظلوم وتعبان وبيتقطع والدنيا كلها عليه
وملقاش غيرها يشكيلها على أساس هي المنقذ !!
. لكنه صامد بس عشان رجولته ، ولما بيقعد لوحده يقعد ييعيط ويسمع عبد الحليم ويشتكي ظلم الأيام له !!
أنا تعبان ومتضايق وحاسس بالوحدة ومحدش فاهمني غيرك ، وباستريح معاكي انتي




كلامه دايما عن الحب والعاطفة وازاي إنهم أسمى شئ في الوجود ، ولو كاتب 10 سطور هتلاقي 9 منهم ( حب / عاطفة / رومانسية / قلب / عياط / دموع / خجل / مشكلة ) حاجة تجيب غثيان يعني



حافظ كل المطربين والمطربات والممثلين والممثلات ومتابع الأفلام الرومانسية القديمة والجديدة ، وتحس كده من كلامه إن الواد ايه : لو الدنيا كلها وقفت بينه وبين "أخته" - اللي هي البت بتاعته يعني !! اللي غالبا بيحكي مغامراته معاها لأصحابه إلا إذا كان ملوش أصحاب ولاد أساسا - هيتغلب عليها ، ومش هيهتم بأي حاجة عشان علاقتهم "الطاهرة البريئة" - اللي ميقدرش يقول لأبوه عليها ولا تقدر تقول لأبوها عليها - تفضل زي ما هي



أنا باقولك الكلام ده بس عشان انتي زي أختي !!



نصيحة :




طبيعة البشر كده : الرجل بيميل للكلام مع البنت والعكس ، ودي غريزة ربنا خلقها لكنه في نفس الوقت وضع قوانين تنظمها لأن في النهاية الندم والدموع الحقيقية مبترجعش حاجة - ولأنه في النهاية الله سبحانه وتعالى هو اللي هيحاسبنا على العلاقة "الطاهرة البريئة" دي بين اتنين اخوات!!




نصيحة تانية :




تأكدي إن أي حاجة مكانها الظلام فهي غلط - محدش بيتكسف يقول فلانة دي مراتي أو يقول فلان ده أخويا وحبيبي، لكن تقدري تقولي للناس أو حتى لأهلك فلان ده أخويا ومفيش بينا أكتر من كده ؟
















((( النصاب الروش .. الكووووووول )))





هاااااااااااااااي ... باااااااااااي


نموذج للشاب المنفتح ماعندوش مشكله في اي حاجة peace
بالنسبه له اي جمله تحتوي على واحده من الكلمات دي" الله- الرسول الاسلام - حرام- لا يجوز- او حتى حلال" تدل على تخلف ورجعيه وحاجة مش cool




ما يعرفش في الدين غير حاجتين (الدين يسر_وربك رب قلوب)
وتحاول تفهمه ان دول مش آيات يقولك "so what ? ايه التشدد ده" هو احنا غلطنا في البخاري!!




بالنسبة له جريمة انك مانزلتش سيتي ستارز في الويك اند او ماسفرتش مارينا في الــ summer vacation
مش قادر يفهم الناس الرجعيين اللي مش بيعترفوا بالصداقةبين الولد والبنت ومش قادرين يفهموا الفرق بين الفريند والــ girlfriend



صاحبنا ده ممكن مانعتبروش نصاب اوي يعني ممكن نعتبره منصوب عليه من الاعلام والثقافة الغربية المستوردة



كلامه بينحصر بين قضيتين مهمتين ، العربيات والبنات ، ولو فيه شريط جديد يبقى دي حالة طارئة ، وضارب الدنيا والدين طناش



بيعتبر إن من حقه إن بابا يلبي كل رغباته وماما تقعد تخدم فيه طول النهار ، وهو - كفاية عليه إنه موجود أصلا .. هيقطع نفسه يا عيني ؟



شكله مكبر دماغه .. لكن الواقع بيقول إنه غالبا مفيش دماغ أصلا عشان يكبره ، وعادة هي دي نفس نوعية دماغ البنت الي بتحب الصنف ده



وفي الغالب يا عيني بيطلع صاحبنا النصاب ده في الآخر من نوعية صاحبنا بتاع زمان اللي كان واهمنا إنه بيتكلم ألماني ويقعد يقول لنجر فلسكاك فلشته شي وفي الآخر طلع بيتكلم كوابري أساسا وقصده النقر في السكك في الشتاء شينة يعني قبيحة !!!



نصيحة :



"ولا دنيا لمن لم يحي دينا"













((( النصاب المفكر / الثورجي )))



أنواع كتير وأبرزهم نوعين : ليبرالي / شيوعي



كاره للمجتمع ولحظه العاثر اللي طلعه وسط ناس هو خسارة فيهم أصلا
بيعتبر إن العرب - الشرق - الإسلام يعني جمال وصحراء وخيام ، ومفيش أمل منهم لو بعد مليون سنة ، وإن النجاة فيما جاءت به أمريكا وأوروبا



صاحبنا مثقف - أو هكذا يبدو - عارف كلمتين عن تشارلز ديكنز - وجول فيرن وكلمتين عن ماري كوري - ونسبية أينشتاين - ومندل - وداروين وكلمتين كمان عنشافيز - وكاسترو - وجيفارا - وغاندي وبيضرب ده كله في الخلاط عشان يطلع الحاجة الأصفرا اللي هيسقيها للبنت !!



مبهور بالقشرة ، ومش واخد باله إنه مفيش لب ، مؤمن إن لا يمكن عربي أو مسلم يكون زي دول إلا لو سابه من حوار الإسلام ده خالص وركز في المفيد : رأسمالية - شيوعية - اشتراكية على حسب



مفيش مانع يكون عنده قدر من التدين ، لكنه التدين الذي لا يتعارض مع مشيئة الغرب !!
تدين لا يعترف بمعظم الغيبيات ، لا يعترف بالجن انتو لسه عايشين في العصور الوسطى؟؟



ولا يعترف بحديث الذبابة والإناء " ايه القرف ده ؟ "
تدين يعتبر الوسطية ( حجة الضعيف اللي مش قادر ياخد قرار ، العالم :يمين وشمال وبس) ومش مدرك إن أعلى نقطة في الجبل تقع عند منتصفه !!



مقادير النصب : خمس معالق إحباط + شوية كلام كبير مع رشة من المصطلحات البرجوازية الراديكالية الفاشية التقلية !!+ كوبايتين فضفضة وكوباية مشاعر وأحاسيس ضعف (عشان يبقى الواد جمع بين العلم والحساسة في نفس الوقت !!!)



نصيحة له :




"إن الدين عند الله الإسلام" .. لف ودور واتخذ من الأديان ما شئت ، وهتلاقي إن "ومن أعرض عن ذكري فإن له معيشة ضنكا"



نصيحة لها :



أسهل حاجة الكلام الكبير ، لكن الرجل الحق بيستخدم الكلام في مكانه الصحيح ، وتأكدي إن "من كثر كلامه قل عمله"















الخصائص العامة للنصابين




1- شاب فاضي




يا بخته ... لأن القاعدة بتقول : نفسك إن لم تشغلها بالطاعة شغلتك بالمعصية



2- أنا فين ؟ أنا على فين ؟




شاب بدون هدف ، ولو زعم غير ذلك - لو خبطت على دماغه احتمال كبير ترن !! ( أصل اللي عينه على الشمس لا تلفت نظره النجوم ) .. إلا إذا كان هدفه هو البنت دي ، وده هدف مش هين ؛ فيه ناس هاجرت عشان امرأة !! "فمن كانت هجرته لدنيا يصيبها أو امرأة ينكحها فهجرته لي ما هاجر اليه ...)



3- بكرة نتوب إن شاء الله




: مسوف : شاب علاقته بالله مش مظبوطة ، ولو زعم غير ذلك أصل :
تعصي الإله وأنت تزعم حبه ... هذا لعمرك في الفعال بديع
لو كان حبك صادقا لأطعته ... إن المحب لمن يحب مطيع
وطبعا العلاقة مش صلاة فقط ، كم من صلاة أديت فقط ليعلم أداؤها !!



4- شاب فنان



بيجيب على كل الألوان .. اللي عايزة حتة تدين يديها ، واللي عايزة خمسة رومانسية فيه ، واللي عايزة شوية كلام كبير ميضرش ، واللي عايزة تفاهة تلاقي برضه



5- تاجر خايب :



يبيع مين عشان معاد معاها على النت أو في الحقيقة ، يبيع الصلاة ، يبيع طاعته لوالدته ، يبيع طاعته لله !!



6- موهوب



عنده حاجة أو موهبة يبهر بيها الناس ، ودايما حاططها في المكان الغلط ، وبايعها برخص التراب : عنده معلومة في الدين وبدل ما يفيد بيها الناس بيفرجها للآنسة ، عنده موهبة في التعبير وبدل ما يكتب أدب يقرأه الناس بيكتب رسايل غرامية مراهقة تضحك العيال الصغيرة عليه .. الخ



7- ضعيف الإرادة :



مطلق العنان لغريزته ومش عارف يتحكم فيها ، وبيسميها لنفسه حب !! طيب ليه الحب ده بيزيد على المسنجر ومحدش شايف كلامكم ؟ وليه بيزيد على الموبايلات ومحدش سامع إلا الله ؟ لأنه غريزة .. شهوة .. أثبتلك ؟ بعد انقضاء لحظة المعصية : بتقرف !!








وما خفي كان اعظم !![/size]

بجد موضوع اكتر من رائع
و شكرااا على النصائح الغالية دى