هل يحل التوك توك أزمة المرور فى مصر ؟

زمن التوك توك

مرّه جابولنا سمّ فيران
موّت لنا كلّ الحشرات

والتوكتوك متقولش شطان
مايموتش باخطر مبيدات
,,,
عمّال يجرى شرق وغرب
وعفـّر تحت التوته علينا

بهجوم برّى كانه ف حرب
خللا الرّدم يسدّ عنينا
,,,
,,,
كنت باشوفك ورا مقطوره
داخل بين عجلاتها الواسعه

شوفت الزّيت نازل تحتيها
قلت اكيد المقطوره واضعه

لقيتك زىّ النونو ياتوكتوك
قلت اسيبك تاخد رضعه

وبكره ياسيدى سنانك تطلع
بعد فطامك تاكل مرعه

خونت العيش والملح ياتوكتوك
لمّا جابولك امبير سرعه

ماشى تلطـّش فى المخاليق
وتـنزّلهم قلب التــّرعه
,,,
,,,
تعكـّر صفو القاعده ياتوكتوك
تحت التوته لكل الشـّله

واستكترت الـّراحه عليّه
انا واصحابى امّا بنتسلـّه

ولو النقل صبح كوتشينه
ماتسوى ف وسط صحابك بلـّه

فاجآه الاقيك عفـّرت الاكل
ويوصل ردمك نص القلـّه

وانا مش ممكن احاسبك عمرى
ولا فيه بينى وبينك علـّه

بس داوشنى ليلى نهارى
كان عليّه ماسك لك زلـّه

مولد ماشى بتسمع ديسكو
تكون درّاسه ف جرن الغلــّه؟
,,,
,,,
مين كان قل لك ان قانونـّا
فى قتل النقل بيحبس مين

مين صرّح لك تجرى بسرعه
واللا تقتـّل بنى آدمين

مين وضـّح لك ان حوادثك
ممكن تخلص فى دقيقتين

ولو موّتّ الدنيا بحالها
تخش الحجز يادوب ساعتين

لوكنت اعرف مين كان جابك
ويّا اصحابك بالملايين

ياخساره ولا كود ولا نمره
ولا سوّاق محتاج تامين

انت الخير والبركه ياتوك توك
وتقول لى مسنود على مين
,,,
,,,
اضطريت انى اسيب شغلى
واغنىّ لجناب التوك توك

دى خليّة تخريب ف بلدنا
وزعيمها وحبيبنا التوك توك

ياضنايا ياحنطور ياصغيّر
طول عمرى وانا احب التوك توك

نص حوادث مصر بحالها
من برّه جت ويّا التوك توك

اىّ حرامى بييجى بلدنا
يقولو لنا كان جاى ف توك توك

وان تاهت حاله واختطفت
واغتصبت تلاقيها ف توك توك

والنشـّال فى الزحمه بيسرق
فى ثوانى يتخبّا ف توك توك

فى صالونك ماقدرش انام
بنزينك فى قفايا ياتوك توك

ولا لازمك خوزه ولا حزام
ولا عندك طفـّايه ياتوك توك

ياواخدنا من الدار للنار
مخايلنا فى الضلمه ياتوك توك

سوّاقك ف رياض اطفال
وبيجرى فى الزحمه ياتوك توك

وسيادته مسنود بسيادته
وانامسنود على باب التوك توك

وح اغنـّي وتغنوّا معايا
ونقولوا فاليحيا التوك توك

توك توك هاى هاى

توك توك هاى هاى
توك توك هاى هاي
توك توك
توك توك
توك توك