عــ 3rB-MiXــرب ميكس



احدث الافلام العربيه والاجنبيه احدث الاغانى واجدد الكليبات مكتبة كامله للبرامج والالعاب قسم خاص للشعر والادب لم نجد من ينافسنا فتحدينا انفسنا
 
الرئيسيةس .و .جبحـثالمجلهدخولالتسجيل

سجل ايميلك ليصلك جديد المنتدى

Delivered by FeedBurner


شاطر | 
 

 حوكشة و بوكشة ... والماتش اياه

اذهب الى الأسفل 
كاتب الموضوعرسالة
l0ng_night
عضو بدأ يظهر هنا كتير
عضو بدأ يظهر هنا كتير
avatar



عدد المساهمات : 26
تاريخ التسجيل : 03/12/2010
عدد النقاط : 28540

مُساهمةموضوع: حوكشة و بوكشة ... والماتش اياه   الإثنين ديسمبر 06, 2010 6:23 am

حوكشة : أيوه يا بوكشة ...
أخبارك و أخبار الدنيا عندك ..أيه..
على فكرة هو الماتش خلص كام ؟

بوكشة : الحمد لله كله تمام
أما الماتش كان و لا في الأحلام !
...... خلص 2 / صفر .

حوكشة: مين جاب الاجوان ؟

بوكشة : لعيب تسلم ايده .

حوكشة: تقصد رجله !

بوكشة : ايده و رجله كمان .

حوكشة: مال ايده بالأجوان ؟

بوكشه : خطفها من رجله بإيده
و صوبها صاروخ فى المليان !

حوكشة: تقصد صوبها بايده ؟

بوكشة : أيوه بايده يا حوكشة .

حوكشة: غريبة دى !
و الحكم ما حسبهاش " لمسة يد "
ولا اداله " إنذار " !

بوكشه : من قوتها !!
لا الحكم و لا المساعد لحقوا يشوفوها !!
ماعرفوهاش غير فى الاعادة
بس اللى كان ...كان !!

حوكشة: نوعها ايه الكورة دي ؟ !

بوكشة : دى كوتشى.
ملهلبة .. لولبية ..
بس ايه !
صناعة وطنية
ميه الميه !

حوكشة: قلى يا بوكشة ..
هو الماتش كان متذاع ؟

بوكشة :أيوه يا حوكشة
الماتش كان متذاع على الفضائيات
و شافته (" الست " قارات ) !

حوكشة: طيب و ( " الست " قارات )
رأيها كان إيه في اللي حصل
أكيد كل خبرعندك وصل ؟

بوكشة : ياه يا حوكشة ! (" الست " قارات )
أول مرة الاقيها كلها مبسوطة
و مزقططة و فرحانة
في ( المرجوم )
ربنا يسدها فى وشه
زى ما سودها
في وش العالم كله
و خربوا كمان !

حوكشة: مين دا ( المرجوم ) ....
تقصد ( ابليس ) !
اللي رجموه الحجاج !!!

بوكشة : .. و بعدين
.لا. .... دا ....
( الموضوع كبير و شرحه يطول )
و انت شكلك كنت نايم يا حوكشة ؟
دا العالم من ظلم دا ( المرجوم ) هاج و ماج !!!
دا خلاه كله صخب و عجاج !!

حوكشة: لا مش نايم و لا حاجة
بس كنت مشغول فى الورشة طول اليوم
و ما شفتش الماتش .
هما حيذيعوه تانى يا بوكشة ؟


بوكشة : يا بنى يذيعوه تانى إيه !
دا لغاية دلوقتى
اتذاع أكتر من ستة مليار مرة !
حوكشة: ليه هو كل واحد من ولاد ( " الست " قارات ) حيشوفه لوحده ؟

بوكشة : أيوه كل واحد منهم ممكن يشوفه لوحده و يلعبوا كمان ؟

حوكشة: جرى ايه يا بوكشه
هو انت حرارتك عاليه ياخويا
علشان كده بتخطرف !
و لا انت علشان اتعلمت السياسة
و متنور و بتقعد مع الكبارات
فاكر انى ماليش فى الكورة
و الرابطة و المنتديات ؟


بوكشة : يابنى أنا كويس
و حرارتي مش عالية
و تمام التمام .
دا النت هو اللي حرارته ارتفعت
و فصل اليومين اللي فاتوا
من كتر زحمة ولاد ( "الست" قارات ) عليه
كلهم عاوزين يشوفوا الماتش
يا ولداه !!!
كابلاته سخنت و هى في عرض البحر !!!
و الجو متلج فجأة جاتله تسلخات !!!
أما إنت طبعا أنا عارفك
راجل كروي
و لفيت" الست قارات "
على رجليك
و انت بتدور على شغل !!!
بعد ما خربها ( المرجوم ) !
و على العموم يا حوكشة
ورشتك الصغيرة و لا سؤال اللئيم .
و انت عارف قعادى مع الكبارات
عمره ما ينسينى اهلى
دول هم الخيرات و البركات .

حوكشة: ماشى يابوكشة بس ماتحيرنيش !!
هو الماتش بيتذاع في التليفزيون ..
و لا على النت ؟

بوكشة : فى التليفزيون و على النت
و كمان على التليفون
ممكن حد يبعتهولك بلوتوث
و ممكن تولع البوتوجاز
يطلع لك في الغاز
أو تفتح الحنفية
ينزل لك فى الميه !
ياللا يا حوكشة شوفه
اتصرف و انا عارفك استاذ .

حوكشة: و الله ما أنا فاهم حاجة !!
بالراحة عليه شويه
وفهمني يا بوكشة
و قولى إيه الموضوع !!
ريحنى ؟

بوكشة : أفهمك إيه يا حوكشة؟
دا الماتش ده اللي ما يشترى ..
اتفرج عليه بدل المرة ..
مليون مرة !!!
حوكشة: جرى ايه يا بوكشه !!
مايكونش قصدك بطولة اندية العالم ؟؟
انا قربت يجيلى جنان !!

بوكشة : أندية ايه يا حوكشة
أنا ما بتكلمش على الماتش اللي كان في اليابان !

حوكشة: هوه كان فيه ماتش تانى ..
غيره كمان ؟

بوكشة : يا عم انا باكلمك على ماتش ( منتظر ) !

حوكشة: أيوه وقعت يا حلو يا زينه
و هو لما لسه الماتش ( منتظر )
عرفت نتيجته ازاى يا ( نوارة العيله )
انت بتسرح بيه يا بوكشة ؟

بوكشة : يا حكشة افهم !!
مش الماتش هو اللي ( منتظر )!
( منتظر ) دا الهداف
اللي جاب ( الاجوان ) !
حوكشة: يا بوكشة أنا عمري ما سمعت عن لعيب
اسمه ( منتظر ) ؟
دا بيلعب فين ؟

بوكشه : دا لعيب تسلم ايده !!
و علشان ما تزعلشى يا حوكشة
تسلم رجله كمان !!
حوكشة: يا بوكشة ماشى
تسلم ايده و رجله
و يسلم كله على بعضه
لكن قلى
( منتظر ) دا بيلعب فين ؟

بوكشة : ( منتظر ) دا
اتولد في الملعب العراقي
فى أواخرشهر اتناشر
سنة ثمانية بعد الألفين ؟

حوكشة: يا بوكشة هو انته حتكلمنى ( بالنحوى )
و لا هوه الملعب العراق فاضي للعب !!!
مش كفاية اللي هوه فيه !!!
حرب و كرب وذل
و كله هوان فى هوان!!!


بوكشة : أيوه يا حوكشة كلامك صح
بس ( منتظر )
دا طلع من وسط كل دى الأهوال
فعلا مش بس لعيب...
دا كمان فنان
يا ريتك شفت الماتش
كان بيشوط على طول
تاتش فى تاتش .
و كان شفى شوية من غليلك
وزال عنك هم و أحزان .
من عمايل ( المرجوم )
مش بس فى العراق !
دا ف كل مكان !!
كان فعلا نفسى تشوف الماتش !!

حوكشة: زهقتنى يا بوكشة
و انت كلامك كده مش واضح
و مانتش صريح
و التيلفون قرب يفصل شحن !
لكن خليتنى لازم أشوف الماتش !
قلى بسرعة أشوفه ازاى ؟

بوكشة : يا سيدي ادخل على النت
ممكن تعرف كل حاجة
و تشوف ( الاجوان )
و ممكن تنزل تلعب
و برضه تجيب ( اجوان )
و تعرف " اسكورك " انت كمان
كل دا ع الموقع اللى طلعوه ع النت
بعد الماتش ما خلص فى نفس الأوان !

حوكشة: يعنى أنا كمان ممكن...
أكون هداف زى " منتظر " ؟

بوكشة : إنت ممكن تكون " منتظر "
و كل واحد اتظلم
سواء كان من العرب
أو من ولاد ( " الست" قارات )
كلهم ممكن يكونوا " منتظر "
ما هو ( المرجوم )
ربنا يسود وشه
كره فيه كل الدنيا .
و الكل فيه
مستنى ساعة سودة
و الكل ( منتظر ) .

حوكشة: طيب أنا ح شوف " كافي شوب"
و أحاول أدخل على النت
و أتفرج ع الماتش
و أحاول ألعب زى ما قلتلى
يمكن أعمل" اسكور"
و أحقق ( رقم قياسي ) .
يمكن دا يحمسنى
و يخلينى زى ( منتظر)


بوكشة : الحق بقى !!!
قبل ( المرجوم )
ما يتسحب !

حوكشة: هو ممكن يتسحب ؟

بوكشة : هو صلاحيته تخلص
على 20 يناير !

حوكشة: و مش حيلعب تانى ؟

بوكشة : ما خلاص بقى ...
حيلعب عند بيتهم ؟
حوكشة: طيب يا بوكشة
هو بالشكل ده
و بعد اللي قلته
و اللى هوا شافه
حيلعب إيه تانى ؟

بوكشة : يلعب ....
في أي حاجة .....
..... و يمكن يبطل.... !
لكن خلى بالك
" براءة الاختراع "
حتفضل لمنتظر !
و عموما لو عوزت حاجة منى
و انت ع النت كلمنى .

حوكشة : أيوه يا بوكشة
انا فى ( الكافى شوب )
و معايه فوكشة
ابن خالك الحاج حسانين
كان بيروى الأرض
وما شافش الماتش هو كمان
ادينى اسم الموقع .


بوكشة : سلم لى عليه و ابقى طمنى ..
اخبار خالك الحاج حسانين ايه ..
. . و دلوقتى ادخل ع النت
زى ما عرفتك
و قلى ع الشاشة قدامك شايف ايه ؟


حوكشة : طيب ماشى أنا خلاص
بدخل ع النت
اصبر ثانية الشاشة ح تقلب .

بوكشة : خلص ياللا يا حوكشة
هو انت اول مرة ع الشبكة بتدخل.

حوكشة : لا ..
بس المرة دى مش سريعة
و مش زى ما انا متعود !!
تقيلة !! و ماشية حود لود !!
يكونش الجهاز متفيرس !!

بوكشة : الجهاز سليم ماتقربلوش
النت هو اللي كابلاته اتقطعت
و سلوكه اليومين اللى فاتوا اتبهدلت
و السفن جاتله من كل مكان
علشان تصلح فيه و تعدله .

حوكشة : و من ايه التقطيع
و بهدلت السلوك
دى ما تكونش سوء سلوك ...
و لا السلوك السوء ...
هوه اللى عطله و بهدله .


بوكشة : يابنى خلصنا
انت دايما بتصحى متأخر
و بتاخد وقت كبير
على ما المعلومة
عندك بتوصل
و بلاش فلسفة ..
انا سبق و قلت لك
الماتش كان السبب
فى كل اللى حصل
واللى لسه بيحصل .

حوكشة : جرى ايه يا بوكشة
انت حتذلنى !!!
علشان حتقولى على الموقع
انا دخلت خلاص
و من غير ما تقولى
كله ظهر قدامى
ما تقوليش إزاى
و لا تستغرب !!!

بوكشة : طيب !!!
ايه اللى قدامك ظهر ؟؟
قلى يا حوكشة ؟؟
و قلت لك تبطل فلسفة و كتر كلام !!!

حوكشة : غريبة يا بوكشة !!!
دا الملعب صغير قوى !!!
و ما فهوش مدرجات !!!
دول يا دوب اتنين بيتكلموا!!!
و شوية ناس قاعدين
و مش شايف كورة و لا شبكة
و لا شايف
حتى العارضة و لا القايمين !
ما يكونش دا ملعب اسكواش !!!

بوكشة :خلصنى ياحوكشة
و ما تكترش فى الكلام
و قلى بسرعة شايف ايه قدامك
أنا عندى من الصبح امساك
مش عارف أدخل الحمام .

حوكشة : شايف واحد صفراوى
على شمالى
نظراته غريبة كده
و شكله مش مريحنى !!!
عمال يتغمز و يتلمز !
بس انا فاكر
بشوف صورته كتير
فى الجرانين
و نشرات الاخبار .

بوكشة : ما هو بقى دى يابنى !!!
اللى مولع الدنيا
و مشعللها !!!
و مطير فيها حريقة
و مش مريح فيها
كهول و لا عيال
و واخد دعوات
من ( " الست " قارات )
تهد جبال !!
و انت عارف
دعوتها مستجابة
و اللى بتدعى عليه
بتجيبه الأرض
ربنا يقبل دعوتها عليه
لا بقى عنده واجب و لا فرض
لا عاوز يفهم
و ودانه طويله
و عنده شحار .
ركز بقى ياحوكشة
ويا الماتش
و قلى ايه اللى بيحصل
قدامك بالظبط.
حوكشة : زى ما بقولك الاتنين اللى واقفين
كل واحد فيهم بيتكلم شوية
بس الصفراوى غلباوى !!
و كلامه كتير
و مش مريحنى
زى شكله تمام .
..ألا .. ألا .. ألا ..
دا بيلخط فى الكلام .
فعلا دا فيه واحد
من اللى قاعدين قام
و فى ايده فردة كندورة
و حدفه بيها !!!
و الصفراوى وطى دماغه !!!
عمرى ما شفته عملها !!!
متعجرف دايما
كان يتكلم
و لا حد يرده
... أيوه ياحكشة معاك ع الخط ...
الكندورة الثانية ف ثانية وراها !!
و اللى واقف جنبه
حاول عنه يحوشها..
عدت منه !!
و خبطت فى راية كبيرة وراهم !!
فيها نجوم كتير.......

واد شويط و الله تمام !!!!

بس انت ضحكت عيله يا بوكشة
قلتلى انها ( كورة )
مش ( كندورة ) .
انا كنت فاكره فعلا ماتش الكورة
دخلتنى فى سكة تانية
ما افهمش فيها
فسرلى يا خويه دى الفزوره !!
وضحلى يا بوكشة !!!
ايه الموضوع دا
بالتفصيل .
مش بعد الماتش
بيجيبوا تحليل !!!


بوكشة :يا حوكشة
دا موضوع شرحه يطول
لكن اقولك باختصار
انت عارف ودانى تعبانى
و محبش اتكلم ع الجوال كتير .
الصفراوى اللى انت شفته ده
و من قبله ابوه
تخصص
دق ذنب و اسافين !!
و انت عارف
احنا غلابه و طيبين .
ابوه ضحك على واحد
كان من كباراتنا
و قاله ادخل على اخواتك
و اللى هما جيرانه
و صور له ان أرضهم
دى كانت أرضه
و انه حيساعده
علىكده و يقف جنبه .
صدقه قريبنا
و أكل الطعم
و جار على حبيايبه .
و طبعا كل الدنيا
غلطت قريبنا
و بقينا كلنا مترزيين
من عمايله و متأزمين .
حاول اخواته يرجعوه
و عن اللى فى دماغه يردوه .
لكن كبرت معاه
و صدق شيطانه
انها كانت أرضه
و مشى وراه .
انت سامعنى يا حوكشة
حوكشة : سامعك
و مش عاوز اقاطعك
احكيلى وضحلى
.. فهمنى و عرفنى .

بوكشة : أيوه معاك ..
و الصفراوى الكبير
زى ما زين لقريبنا
يدخل على اخواته
زين لهم برضه
انه ح يحرهم
و يحوش عنهم
و كله على الفاتورة
و ياما ( جاز ) علينا ياحوكشة
طبعا الدنيا كلها
قامت على قريبنا
و اتجيشت جيوش
و مبقاش حد يحوش
لغاية ما طلعوه
ورجعوا الحق لصحابه
و ظهر الصفراوى الكبير
قدام الدنيا
انه مع الشرعية
و الكلام الكبير
اللى تلاقيه يتنفذ فى ناحية
و فى الناحية ما تسمعهوش
و انت شايف حبيايبه
بيعملوا ايه فى ولاد عرفات
بعد ما خلوهم شلل
و كل شلة تضرب فى التانية ..
و حلق حوش ..
مش قلت لك يا حوكشة ...
احنا غلابة و طيبيين
و خد من دا يا حوكشة
كتير ذنب و دق اسافين
.. حكيم الصفراى و اللى زيه مايحبوش
اتنين خوات
يكونوا مع بعض متفهمين
و ما يهدالهم بال
الا لما يشفوهم
فى بعضهم مقطعين
.... هو الصوت واضح ياحوكشة
و لا انت نمت تانى .
حوكشة : سامعك
و مش عاوز اقاطعك
احكيلى و وضحلى ..
فهمنى و عرفنى
دا انت يا بوكشة طلعت
داهية !!!


بوكشة : و لا داهية و لا حاجة !!
احنا اللى بننسى التاريخ !!!
و كل صفراوى
يقعد ورى التانى
اربع سنين و لا تمانية
و يقعد يقلنا كلام
ملوش لون و لا معنى
نصدقه و نمشى وراه
و يقضى هو سنينه
و يتقدوموا
و يعملوا اللى عاوزينه
و احنا كل واحد مننا
فى سكة
كلنا تاهين
و عمرى
ملقيتنا مرة
على رأى واحد
حتى و لو كان غلط
متجمعين
. لغاية ...........
ما جه الصفراوى الصغير
اللى انت شفته فى الماتش
و قال ( نووى )
و كلام كبير
و عين نفسه على الدنيا
سلطان و أمير
ومتولى اصلاح الكون
وهوه عليه غفير
و طاح باللى سبق لأبوه
انه غرر بيه
و قعد فى أرض منتظر
نهب و تكويش
على ( الجاز)
و الغالى و النفيس
.. قتل ولاد
و هلك شباب و شيوخ
و استحيا من الحريم
كتير و كتير
و السجن عمله كبير
و سماه " أبو غريب "
دا غير الضرب و التدمير
مصانع و منشأت و كبارى ..
مخلاش فيها غير خراب للغربان
و ماتسمعشى فيها
اصوات غير النعيق ..
لغاية ما ربك أذن
( لمنتظر )
يكسر أنفه و يذله
و يطلعه منها مخزى
و بالعار متغطى .
روح يا ( مرجوم )
الهى يجعلك عبرة
لكل مفترى و ظالم
و يخلص من جتتك
ذنب كل من كان
بسببك مظلوم .
حوكشة : هو انت زعلت منى يا بوكشة
انا قصدى انكشك
علشان اطلع اللى جواك
و تقوللى نعمل ايه
فى اللى احنا فيه
هى الصورة
سوده قوى كده
و مش عجباك .



بوكشة : الصورة اسود
من السواد ذاته
و جوايه مرارة
لو تتحط فى البحر
تغيرمنه طعم ميته
و تموت فيه سمكاته
و لو ليها ريحة
تغير فى الهوى نسماته
و تعكر على كل مخلوق
نفسيته و شهواته .
منك لله يا حوكشة
قلبت عليه المواجع
كلها و فكرتنى باللى جرى
فى سنين طويلة
لونها كحلى كلها
ماشفنهاش مرة ... بنبى
على رأى اللى كانت
بتقول زمان
فى الراديو
و بتغنى .

حوكشة : اقفل معاك يا بوكشة دلوقتى
علشان خاطر ودانك
انا عارف انها بتتعبك م المحمول
و نتقابل بالليل
الواد فوكشة ابن خالك جعان
حنشوف لنا لقمة ناكلها
و نشرب شوية شاى
و نضرب لنا حجرين
و يمكن نعدى
على خالك حسانين
انت عارف برد الشتا
و هو تعبان بالمرارة
و عنده الكلى
و الكبد عنده كسلان
دا غير موضوع
القلب و الشرايين .....
عموما نتقابل بالليل
و يمكن يجى معايه فوكشة
ياريت تجيب معاك
حد من اصحابك
ادى احنا نتكلم
و نشوف اخبار الدنيا ايه
و ايه الواجب علينا .
كلامك دا شيلنى الهم
و خلانى متألم


فوكشة : يا بوكشة انت اتكلمت
كتير مع حوكشة
و أنا قاعد زى الأطرش في الزفه
ما تقولي يابن عمتى
الموضوع ايه !!!
مش احنا كنا جايين
على الماتش نتفرج
مالكوا كده قلبتوها
حزن ونكد !!!
انا كرهت الماتشات
بعد ما كنت جاى فرحان
انى ح اقعد على
النت و الشات
و نشوف ايه الحكاوى
و الحكايات .
حوكشة : ياللا بينا يا فوكشة ناكلنا لقمة
و نقعد شوية ع القهوة
نشرب خمسينة الشاى
ونشد النفسين
انت عارف الجو بيبرد
و عاوزين نشوف
خالى حسانين
قبل ما ينام
يمكن يكون محتاج علاج
و لا نشوفله اسبرينتين
و علشان ما نسهروش
انت عارف السن الكبير
و لسه حنتقابل مع بوكشة
يفهمنا و يطمنا
على اخواتنا
و اللى فيه متبهدلين .


فوكشة : .. أه ..هو العيش كده ماله
مش مستوى و كله عجين
وفيه نشارة خشب
و جوز مسامير
والطعمية زيتها اسود
حتى ما حصلش
زيت التموين
منهم لله صحاب الافران
بيبيعوا الدقيق فى السوق السودة
و مشغلين معاهم
عصافير و فتوات
و العيش اللى يلخبطوه و يلعبطوه
يدوه للمطاعم و فوالين العربيات
الا ده مش غلط يا بوكشة
ان المطاعم تاخد عيش مدعوم
و احنا ندور عليه ما نلقيه
يعمل ايه الفقير و المعدوم .
و اللى جوزها مات
و ابنها محروم
حوكشة : احمد ربنا يا فوكشة
ادى احنا ف بلدنا عايشيين
و مطمنيين و بالأمن حاسين
و الحكومة بتاعتنا
و اخواتنا فى التموين
بيعملوا على اخرهم
مع بتوع المخابز
يعنى احنا شوية
كويسين
اخواتنا حوالينا
لا ابيض و لا اسود
لاقيين
و الأعادى فيهم
متحكميين
شوية يقفولوا الدنيا عليهم
و شوية يفتحوها
و نازلين فيهم
ب الإف ستاشر
ضاربين
و الصواريخ
عمالة تقتل
أطفال و مدنيين
بتقتل و بترمل
و بتثكل و بتدمر
كأنهم مش بشر
و لا بنى أدمين
و فين بقى
حقوق الانسان
و هما فى الضلمة
عايشين
ربنا يفك أسرهم
و يهلك عدوهم
و يهدينا احنا العرب
و يجمع شملنا
قول يارب امين .


فوكشة : ما تسك ع الشيشة
يا حوكشة !!
ما هى اللى قطعت نفس
خالك حسانين
و بوظتله الشرايين
وأنا من دلوقتى نويت
أرجع عنها و ابطلها
و انوى انت كمان
مش لازم نستني
لما نقول قلب و شرايين
و ساعتها حنبقى مساكين
و للنفس مش لاقيين .


[overline]الحاج حسانين :[/overline] ..أه ..أه. أه ...
الباب بيخبط يا حاجة فتحية
.أه ..أه ..أه ..
شوفى مين ؟


الحاجة فتحية : دا فوكشة إبننا
و حوكشة ابن اختك شوقية
.. و الله يا ولاد فيكوا الخير
النهارده الحاج تعبان شويه
ما تشوفوا له العلاج بتاعه
و لا تدوله الأسبرين .


فوكشة : الف سلامة عليك يا بويه
الكيس اللي فيه العلاج فين ؟
كوباية الليمون الدافية يأمه
دفى نفسك كويس يابويه
ان شاء الله تعرق
و الصبح تكون كويس
و تكون صحتك زين


الحاجة فتحية : اجيب لكم لقمة تأكلوها ياولاد
و اعمل لكوا الشاي
ما هو اخواتك البنات
يا فوكشة نايمين
طول النهار
من شغل الدار تعبانين .


فوكشة : احنا أكلنا بره يامه..
و الشاى
انا ح اعملنا كوبيتين
استريحى انتى
الله يكون فى عونك
طول النهار تعبانة
فى شغل الدار
بين تنضيف
و مسح و غسيل
دا غير الطبيخ
وغسل المواعين
و كمان الخبيز
بعد العجين .


[overline]الحاج حسانين [/overline]: أه ..
الحمد لله
انا بقيت كويس
الحاجة شوقية صحتها عاملة ايه يا بوكشة
و ازى اخوك ( نوارتنا )
بقاله كام يوم ماطلش عليه
ان شاء الله يكونوا كويسين ...
ابقى ( بلغهم ) سلامى . ..
الله يرحم والدك
كان راجل
و لا كل الرجالة
استشهد
فى حرب تلاتة و سبعين
حوكشة : حلوه !!
الله يحظك يا خال
حلوه ( بلغهم ) دى
ماهى ( المداسات )
كلها عاملة شغل جامد الأيام دي
بعد كندورة ( منتظر)
اللى رجم بيها ( الملعون ) .
( بلغه ) بيها ..
و ( بـ.. لغه ) هو يفهمها !!
تحية من كل العرب
ألا ايه رأيك يا خال ..
في اللى حصل .؟؟
أما سلامك لأمي و أخويا
اعتبره وصل .


[overline]الحاج حسنين :[/overline] يا ابنى ....
البنات كانوا بيتفرجوا
على الاخبار فى التليفزيون
أنا شفته
الولد فعلا تسلم ايده و رجله
اللى كان لابس فيها
( الكندوره )
دا واد يساوى
من الشباب مليون .
ادهاله و لا رفسة الحصان ....
فكرنى بمحمد على كلاى
لما كان يلف زى النحلة
و يضرب بايدة
يجيب للى قدامه دوار
ما أنا ماكنتش بأفوت له
و لا جوله ....
و الواد ( منتظر )
هو الوحيد فينا كلنا
اللى خلى ( المرجوم ) يوطى
و يطاطى غصب عنه
و الله الواد دا رفع
من روحى المعنوية
انا فرحان بيه
و مبسوط كمان منه.
حوكشة : على العموم يا خال
احنا الحمد لله اطمنا عليك
و نستأذن منك انا و فوكشة
رايحيين نسهر عندنا شوية
فى المندرة البحرية
شرحة و برحة
و هواها يرد الروح
و تساع من الحبايب ألف
مع ولاد عمى و صحابنا
نتكلم فى اخبار الدنيا ...
نشوفك على خير.....
ان شاء الله ......
و دايما في احسن الاحوال .


[overline]الحاج حسانين :[/overline] مع السلامة يا ولاد
بس خلوا بالكوا
دا الموضوع كبير قوى
و بيفكرنى بعلتى
و تدهور صحتى
الحل لازم تتفقوا
و مع بعضكوا
تتجمعوا وتتلموا
الوقت ما بقاش يتحمل
كل واحد يكون فى شتات
عداكم متربصين بيكم
و من غير ما تتجمعوا
لا يمكن يعمل لكوا حساب
عموما السلام ... أمانة .[/size]
[/quote]
الرجوع الى أعلى الصفحة اذهب الى الأسفل
الدماغ العالية

شيخ الغفر


شيخ الغفر
avatar



عدد المساهمات : 547
الاوسمه :
تاريخ التسجيل : 19/07/2008
عدد النقاط : 37633

مُساهمةموضوع: رد: حوكشة و بوكشة ... والماتش اياه   الإثنين ديسمبر 06, 2010 3:48 pm

قصة دي بقى ولا حدوته بس
فنااااااااان بجد




انا اللي بالامر المحال اغتوى
الرجوع الى أعلى الصفحة اذهب الى الأسفل
l0ng_night
عضو بدأ يظهر هنا كتير
عضو بدأ يظهر هنا كتير
avatar



عدد المساهمات : 26
تاريخ التسجيل : 03/12/2010
عدد النقاط : 28540

مُساهمةموضوع: رد: حوكشة و بوكشة ... والماتش اياه   الإثنين ديسمبر 06, 2010 4:30 pm

انا عارف انى فنان وانا محتاج انك تقولى
الرجوع الى أعلى الصفحة اذهب الى الأسفل
 
حوكشة و بوكشة ... والماتش اياه
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
عــ 3rB-MiXــرب ميكس :: الادب والشـــعر :: الشعر-
انتقل الى:  
الساعة الأن  بتوقيت (مصر)
جميع الحقوق محفوظة
عرب ميكس
 {powered by info@3rbmix.com}
حقوق الطبع والنشر©2011 - 2010