Prison Break :: new season ,, Exclusive

الثلاثاء أكتوبر 19, 2010 2:39 pm

Prison Break

مسلسل مشهور .. قصته بتدور عن أحداث واحد عايز يحرر أخوه من السجن علشان محكوم عليه بالإعدام..

لكن احنا مسلسلنا حاجة تانية ..

احداث مسلسلنا بتدور في مكان بعييييييييييييييييد.. في سجن كله ضلمة ووحشة وهمّ واكتئاب وقول في أوصافه زي ما تقول..

كل واحد فينا هو بطل مسلسلنا..ايوه ؛ مش مايكل سكوفيلد ولا سارة تانكريدي..أنا وانت وانتي أبطال المسلسل ده..

مسلسلنا مش موسم واحد ولا اتنين ولا عشرة ..مسلسلنا عدد حلقاته مفتوح لحد ما كل واحد يحدد نهايته بإيده .. أو تتحدد غصب عنه ..!!

مسلسلنا البطل فيه مش محكوم بالاعدام بالكرسي الكهربائي وعايز يهرب! ده كانت تبقى حاجة بسيطة جدااااااا..

مسلسلنا البطل فيه محكوم عليه بجنهم .. فهل هيقدر يهرب ؟؟؟

كل واحد فينا أسير وسجين في سجن المعصية..
وكل يوم بتقضيه في المعصية..المعصية بتزود القيود والقضبان حواليك اكتر واكتر طول ما انت قاعد ومش بتحاول تتغلب عليها او تتخلص منها..!

نفس التشبيه اللي الرسول صلى الله عليه وسلم شبهه وقال:
إن مثل الذي يعمل السيئات ثم يعمل الحسنات: كمثل رجل كانت عليه درعٌ ضيَّقةٌ قد خنقته
ثم عمل حسنة فانفكت حلقة، ثم عمل حسنةً أخرى فانفكت أخرى، حتى تخرج إلى الأرض

سجون المعاصي أنواعها كتير..

فيه ناس مسجونين في سجن الشهوة ..
وده سجن قضبانه شديدة ..واقفاله كتيرة ..ومحدش بيخرج منه بسهولة ابدا..
بس فيه ناس خرجت..فيه ناس كسرت كل الاقفال والقضبان وخرجت..
فيه ناس قالت لأ وقاومت شهوتها وانتصرت..ناس عرفت ان الشهوة لذة دقايق وبتنتهي ..ناس عرفت ان اللذة الدايمة في طاعة ربنا .. فكان لازم تهرب من سجنها..

وفينا ناس مسجونين في سجن الحب والغرام ..
وده سجن أسواره عالية..وفيه تعذيب للقلوب كل دقيقة..القلوب اللي اختارت حبيب وفضلته على ربنا..فكان لازم تتعذب بالحب الحرام!
بس فيه ناس قدرت تهرب..ايوه ، فيه ناس قدرت تقتحم السجن وتخطي كل الاسوار وترجع تاني بقلب أبيض مليان حب ..بس حب من نوع تاني..أطهر حب في الوجود ..حب الله..

وفيه ناس بقالهم سنين في سجن المخدرات ..
يمكن مدخلوش سجن المخدرات بتاع الحكومة في الدنيا ..بس المعصية دخلتهم في سجنها..
وسجن المخدرات عليه حراس كتير ومعاهم اسلحة بيجيبوك من كل مكان لو حاولت تهرب..أصدقاء السوء..اللي بيشدوا اي واحد بيحاول يخرج ويرجعوه ..اللي بيعزموا عليك بحاجات فيها الهلاك في الدنيا قبل الاخرة!
سجن صعب اووووووووووووووي ..بس فيه ناس قدرت تخرج منه..ايوه ، فيه ناس قدرت تقتحم السجن وتهرب من كل اصحابها وتبدأ حياة جديدة..بجسم نضيف وقلب نضيف..

وفيه سجن اسمه سجن الغفلة..
وده من اشد انواع السجون تحصين وحراسة ومتانة ..عارفين ليه ..لأن اللي قاعد على بابه هو الشيطان ..!
سجن الغفلة مسجون فيه ناس كتير مننا .. تايهة في الحياة..مش عارفة هي عايشة ليه اصلا..ليلها نهار ونهارها ليل ..كل همها انها تكسب قرشين وتجمع فلوس ..هي دي الدنيا ..يومين وبنقضيهم .. مفيش صلاة..مفيش قرآن ..مفيش ذكر..الشيطان عشش حوالين قلبها خلاها تنسى كل حاجة ممكن تفتكر بيها الاخرة ..نساها ان فيه جنة ونار..نساها ان فيه موت وحساب وعذاب..وللاسف ..مسجاين كتير ماتوا جوه سجن الغفلة وهما على طريق ملهوش نهاية غير جهنم!
بس فيه ناس فاقت..ايوه فيه ناس فاقت وعرفت ان الشيطان ضعييييييييف...بس الموضوع محتاج انك تحط هدف قدام عينيك..رضا ربنا والجنة..وانت هتكسر كل التحصينات وتخرج للنور من تاني..

سجون المعاصي كتير ..والمساجين اكتر..
بس لازم يهربوا...مفيش حل تاني..
لازم يحصل prison break
لازم يحصل اقتحام لسجون المعاصي..
والا .. حاجة من اتنين..
- كل يوم هتفضل قاعد فيه جوه سجن المعصية ..المعصية بتزود أسوارها وقيودها حواليك..وهتتصعب مهمتك في الخروج من سجنها!!
- وكل يوم انت قاعد فيه جوه سجن المعصية..انت معرض ان يجيلك ملك الموت وانت لسه محبوس ..وتكون النهاية اللي مفيش بشر يقدر يتحملها..الناااااااااااااااار!

لازم تعرف انت بتهرب من ايه علشان تقتحم سجون المعصية وتهرب منها..
انت بتهرب من جهنم..!!
انا بقولك لو تستحمل تشرب كوباية شاي وهي سخنة مولعة خليك قاعد فيه..!
انما انت مبتقدرش على نار شمعة حتى..هتقدر على جهنم ازاي؟؟

اهرب بجلدك..عدي كل الأسوار ..شيل كل العقبات اللي واقفة في طريق التوبة ...
متخليش اي حاجة تقف في الطريق بينك وبين ربنا..

وتأكد.. تأكد 100 %
انك مجرد ما هتحاول تهرب من المعاصي وتقرب من ربنا..هتلاقي الملك الكريم بيقولك ( أنا عند ظن عبدي بي وأنا معه حين يذكرني فإن ذكرني في نفسه ذكرته في نفسي وإن ذكرني في ملأ ذكرته في ملإ خير منهم وإن اقترب إلي شبرا اقتربت منه ذراعا وإن اقترب إلي ذراعا اقتربت إليه باعا وإن أتاني يمشي أتيته هرولة ) حديث صحيح
هتلاقيه بيقولك ( وَهُوَ الَّذِي يَقْبَلُ التَّوْبَةَ عَنْ عِبَادِهِ وَيَعْفُو عَنِ السَّيِّئَاتِ وَيَعْلَمُ مَا تَفْعَلُونَ)
هتلاقيه بيقولك ( قُلْ يَا عِبَادِيَ الَّذِينَ أَسْرَفُوا عَلَى أَنْفُسِهِمْ لَا تَقْنَطُوا مِنْ رَحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ )
هتلاقيه بيقولك ( إِلَّا مَنْ تَابَ وَآمَنَ وَعَمِلَ عَمَلًا صَالِحًا فَأُولَئِكَ يُبَدِّلُ اللَّهُ سَيِّئَاتِهِمْ حَسَنَاتٍ وَكَانَ اللَّهُ غَفُورًا رَحِيمًا )
يعني سجلاتك السودا وملفاتك كلها هتتمحي ..ويتحط بدالها اطهر واحسن ملفات ..
سيئاتك كلها هتتبدل حسنات..مستني ايه؟؟

مفيش وقت..مين عالم هتعيش لبكرة ولا لأ ؟؟
الحق نفسك .. وفكر مرة واحدة صح في حياتك..هتلاقي ان مفيش طريق سعادة في الدنيا والاخرة غير طريق ربنا

قوم دلوقتي ..اغتسل ..واتوضا ..وهات السجادة ..وطفي النور..صلي ركعتين..واقف بين ايدينا ربنا..وقوله رجعلتلك يارب..وانا عارف انك هتقبلني مهما عملت من ذنوب معاصي..مفيش اي حاجة هتعطلني عنك يارب..
هيبقي هدفي الوحيد..هو رضاك عني يارب..

كفاية بقى..مشبعتش معاصي كل ده..كفاية بقى..
يلا نكسر كل قيود المعاصي..يلا نحرر قلوبنا من أسر الذنوب..
يلا نحط نهاية للمسلسل ..
أجمل وأسعد نهاية ..
التوبة الي الله

*** The End ***
جزا الله خيرا كاتب الموضوع
خير الجزاء
ونرجوا الدعاء لناقلها

الأربعاء أكتوبر 20, 2010 1:07 am

ما شاء الله موضوع رائع جزاكى الله كل خير اللهم ارحمنا واهدنا يا ارحم الراحمين

الأربعاء أكتوبر 20, 2010 1:12 am

تسلمى ايمى كالعادة موضوع متميز من انسانة متميزة

Prison Break :: new season ,, Exclusive

Prison Break :: new season ,, Exclusive

رد: Prison Break :: new season ,, Exclusive

رد: Prison Break :: new season ,, Exclusive